O Concello de Rianxo, a través do seu alcalde Julián Bustelo, anunciou que vai licitar o contrato de subministración de enerxía eléctrica das instalacións municipais, unha actuación que segundo indicou o rexedor “permitirá reducir en aproximadamente 100.000 euros o gasto anual na factura da luz”. Esta iniciativa posibilitará regularizar a situación do servizo e, en palabras de Bustelo, “súmase ao labor que se vén executando nestes últimos tres anos e grazas á cal hoxe xa pagamos uns 200.000€ anuais menos que no 2023”.
O novo contrato tramitarase a través do Acordo Marco da Central de Contratación da Federación Española de Municipios e Provincias (FEMP). Terá unha duración inicial dun ano e un custo de 514.821,65 euros (IVE incluído).
Con este novo contrato, o Concello de Rianxo reforza a súa aposta por unha xestión eficiente e responsábel dos recursos económicos “combinando seguridade xurídica, transparencia nos procesos de contratación e aforro económico”, engadiu o alcalde.
