A entidade Solidariedade Galega co Pobo Saharauí (SOGAPS), coa colaboración do Concello de Rianxo, organiza a V Andaina Solidaria a Favor do Pobo Saharauí.
Será o día 22 de agosto e segundo confirmaron dende as entidades organizadoras, “terá un perfil moi accesíbel e disporanse dous percorridos para que as persoas participantes poidan escoller a distancia que máis lles preste”.
Todo o recadado será para a dita entidade solidaria: uns fondos que permiten, entre outras cousas, financiar o programa Vacacións en Paz, unha iniciativa na que se envorca cada ano o Concello e cidadanía de Rianxo favorecendo que moitos nenos e nenas pasen o verán afastados das temperaturas que nestes meses se acadan nos campos de refuxiados do deserto.
Temos máis información sobre a andaina na web Emesports.
Poderán participar todas aquelas persoas que o desexen sen distinción de idade ou sexo sempre “que se inscriban axeitadamente”. As persoas participantes menores de idade deberán cumprimentar unha autorización paterna, materna ou do/a titor/a legal para poder participar.
As persoas que non poidan participar poden facer a súa achega de colaboración a través do Dorsal 0.
Saída e chegada a praza Castelao
Establécense 2 percorridos na contorna do paseo marítimo e a senda litoral de Taragoña.
1 Percorrido verde: 5 km.
2 Percorrido Vermello: 11 km.
A saída do evento realizarase despois da actuación dos Gaiteiros de Fogo Fatuo, a partir das 10:00 horas.
