A Consellería do Mar, a través de Portos de Galicia, está a investir 50.000 euros na renovación integral do pavimento de madeira do peirao flotante (pantalán) para embarcacións pesqueiras e tradicionais do municipio coruñés de Ribeira. Os traballos, que se atopan en execución, inclúen tamén a mellora do pavimento da pasarela que dá acceso a este pantalán de descarga.
En concreto, as obras consisten no desmonte do pavimento de madeira, formado por táboas e dormentes, e a posterior substitución por novo pavimento tecnolóxico de maior durabilidade e resistencia ante condicións climatolóxicas adversas. O ámbito da actuación abrangue 374 metros cadrados de pavimentos. Portos informou que “en todo momento facilitarase o acceso dos usuarios ás súas embarcacións, adoptando as medidas precisas”.
Con esta actuación, Portos de Galicia busca “mellorar a seguridade do tránsito nestas instalacións flotantes minimizando os riscos de esvarar ou de accidente”, e ademais quedarán repostas as táboas en mal estado debido ao deterioro do material polas condicións climatolóxicas severas que soportan e a acción do mar.
As obras no porto de Ribeira enmárcanse nun contrato global para unha decena de portos autonómicos por importe de 640.000 euros. Con este plan, o ente público reforzará a resistencia das instalacións flotantes ante condicións adversas no porto ribeirense así como nos de Lorbé (Oleiros), Muxía, Muros, A Barquiña (Outes), A Pobra do Caramiñal, Carril (Vilagarcía), Vilanova de Arousa, O Grove e Baiona.
