O PSdeG de Ribeira levará ao pleno municipal a situación do lavadoiro da Penisqueira, en Aguiño, unha situación que os socialistas cualifican de “abandono” e de “deterioro apenas tres meses despois da inauguración da súa postas a punto”. Lembran que a actuación foi aberta ao público o pasado 25 de marzo e que “supuxo un investimento de 48.198,54 euros”. Tratouse dunha intervención destinada a recuperar un espazo de especial valor histórico, social e paisaxístico para a parroquia.
O portavoz socialista, Fran Suárez-Puerta, considera “incomprensíbel” que “unha obra tan recente presente xa unha falta evidente de coidados”. E engadiu: “Non estamos falando dun espazo abandonado dende hai anos, senón dunha actuación inaugurada hai apenas tres meses e financiada con diñeiro público”. Segundo dixo, “o problema non se limita á mala imaxe que ofrece actualmente o lavadoiro, xa que a ausencia dunha limpeza regular e dun mantemento continuado pode favorecer a degradación dos elementos rehabilitados, incrementar o risco de escorregamentos e provocar problemas de salubridade nunha zona frecuentada tanto pola veciñanza como polos visitantes”.
O voceiro incidiu tamén “na relevancia social do enclave” e lembrou que o propio Goberno local o presentou como parte da memoria colectiva de Aguiño.
O PSdeG lembra tamén “que a actuación foi executada con fondos europeos”, polo que considera “necesario garantir a súa conservación, funcionalidade e permanencia no tempo”. Para os socialistas, “a responsabilidade municipal non remata coa finalización da obra nin coa súa presentación pública”, senón que debe “continuar cunha planificación estábel de limpeza, revisión e reparación das deficiencias que poidan aparecer”.
Por este motivo, o Grupo Municipal Socialista reclamará ao Goberno local “unha actuación inmediata para limpar e acondicionar o lavadoiro, revisar o estado dos elementos rehabilitados e corrixir as deficiencias existentes”. A formación solicitará tamén “a creación dun plan de conservación posterior para todas as actuacións de recuperación do patrimonio que se están levando a cabo no municipio, co obxectivo de evitar que situacións coma esta volvan repetirse”.
