O Cantón da Leña acollerá este martes, 21 de xullo, ás 20.30 horas, a representación de A Landra Viaxeira e o amigo Lambón, o espectáculo familiar de Os Jalochos, dentro da programación cultural de verán da Pobra do Caramiñal.
A compañía, formada por Sabela Olivares e Suso Bello, ofrece unha proposta que combina música, baile e narración para seguir a Landra e ao seu amigo Lambón nunha viaxe por Galicia. Ao longo do percorrido, coñecerán personaxes como Picapeixe e Picapaus, Ramón o Salmón, a píntega Leda, Old Pot ou Lara, a píllara espacial.
Durante o espectáculo, unha folla de carballo transfórmase en distintos medios de transporte para acompañar esta aventura, que convida a descubrir diferentes lugares de Galicia a través da música e da participación do público.
A obra promove valores como o respecto pola natureza, achega a lingua de signos ás crianzas e anima a cantar e bailar, converténdose nunha experiencia pensada para o desfrute do público familiar.
Esta actuación forma parte da programación cultural de verán impulsada polo Concello da Pobra do Caramiñal, que continúa ofrecendo actividades para todas as idades nos diferentes espazos públicos do municipio.
