O PSOE de Ribeira emitiu un comunicado a respecto do proxecto do novo polígono de Pedras Vermellas e do anunciou achegado pola Xunta este martes 7 de xullo no que se confirma que Xestur asumirá a actualización do proxecto, o financiamento, a licitación e a execución das obras do proxecto. “Isto”, din, “confirma o que os socialistas veñen advertindo desde hai tempo: un proxecto desta dimensión non podía depender só da capacidade económica do Concello e precisaba da implicación real da Xunta de Galicia”. O portavoz do grupo, Fran Suárez-Puerta, sinalou que “se o proxecto chegou ao punto no que se atopa hoxe, foi grazas ao traballo desenvolvido polo goberno municipal anterior, do que formaba parte o PSOE” e engadiu que “a Xunta entra agora porque había un traballo previo feito, porque houbo xestión, tramitación e impulso municipal”.
Suárez-Puerta dixo tamén que “o proxecto herdado do Partido Popular arrastraba erros graves na súa delimitación, chegando mesmo a incluír parcelas situadas no termo municipal da Pobra do Caramiñal, co atraso administrativo que iso provocou”. E engadiu: “É difícil falar de boa xestión cando nin sequera foron quen de delimitar correctamente o ámbito dentro dos límites do seu propio concello. Fronte a esa situación, foi o goberno anterior, coa participación do PSOE, quen tivo que impulsar a tramitación para conseguir que Ribeira chegase ata aquí”.
O portavoz socialista considerou que “a entrada de Xestur demostra que a Xunta podía implicarse moito antes” e sinalou que “durante anos, mentres o PP non gobernaba en Ribeira, a Xunta escudouse en que o polígono era un proxecto municipal para non colaborar de maneira real”. De feito, engadiu Suárez-Puerta, “nin Xestur nin a Consellería de Economía e Industria querían simplemente sentarse a escoitar o proxecto”. Porén, apuntou, “agora todo son facilidades: de súpeto, Xestur asume a modificación técnica, o financiamento e a futura execución das obras”.
Suárez-Puerta enmarcou esta situación no seguinte patrón: “É o mesmo que pasou coas festas de Ribeira, coa residencia de maiores e agora co polígono industrial. Desde Santiago bloquean, atrasan ou deixan morrer os asuntos cando non goberna o PP; e despois, cando interesa politicamente, aparece unha foto coa señora Sampedro e parece que todo se arranxa. Como dicía Aznar, ‘quen poida facer, que faga’; e a Xunta fixo: fixo todo o posible para frear Ribeira cando non gobernaba o PP”.
