Esta fin de semana, dende este venres 3 de xullo ata o domingo 5 de xullo, o MUGART (Museo do Gravado de Artes) vai celebrar un novo Obradoiro de Gravado, desta volta adicado ás técnicas do litogravado e a augaforte.
Nesta ocasión participan 13 alumnos/as de distinta procedencia: A Coruña (Ribeira, Ames, Santiago), Lugo, Pontevedra Madrid, Cáceres, Salamanca. A entrega de diplomas do curso terá lugar o domingo, 5 de xullo, ás 13.30 h no taller do Museo do Gravado.
O obradoiro será impartido polos profesores da Universidade de Salamanca (Instituto de Investigación en Arte y Tecnología de la Animación USAL) Isabel Carralero, José Fuentes Esteve e Antonio Navarro.
Neste curso, os artistas participantes poderán experimentar, en claves de creación persoal, un novo proceso de gravado que o seu autor, José Fuentes, chamou litogravado. Este proceso deuse a coñecer na súa tese doutoral no ano 1985. Trátase dun proceso de gravado que achega unha nova forma de obter imaxes gravadas sobre cobre a partir dun debuxo realizado directamente sobre o mesmo. O carácter gráfico das imaxes obtidas a través deste proceso é moi similar ás do debuxo litográfico sobre pedra, de aí o seu nome. As imaxes créanse debuxando cun lapis graxo sobre o cobre que foi previamente tratado para que o lapis se adhira e o trazo proporcione unha ampla gama de tons. Este proceso inspirouse no debuxo litográfico, pero ao tratarse dun proceso de gravado, “adquire unha dimensión distinta que parte da singularidade da súa natureza técnica, é dicir , de como se crea a matriz e de como se imprimen”, sinala o MUGART, engadindo que “o debuxo directo sobre o ferro de cobre permítenos crear imaxes de debuxo fresco e directo, pero tamén se poden obter imaxes elaboradas onde a textura e as tonalidades determinen a imaxe”.
