O Concello de Boiro está a executar as obras para a reordenación e urbanización do parque de Cimadevila. O alcalde, José Ramón Romero, visitou este martes 14 de xullo o lugar para coñecer como se están a desenvolver as actuacións.
Con esta actuación o que se pretende é a renovación dun espazo de lecer situado no lugar de Cimadevila, así como aumentar os espazos de aparcamento nunha zona moi transitada.
“Seguimos traballando no acondicionamento de espazos públicos e na dotación de servizos á veciñanza como neste caso cun parque infantil e dotación de zona de aparcamento nun lugar con moita demanda”, destacou o alcalde, engadindo que as actuacións que se pretenden levar a cabo implican o desmonte e recheo de terreos coa execución de muros; o transplantado de árbores; a pavimentación da zona de aparcamento; a pavimentación do parque infantil; a reordenación dos contedores; e a instalación de mobiliario, sinalización e outros equipamentos.
Esta actuación, que ascende aos 178.365,18 euros está financiada mediante o POS+ Concellos da Deputación da Coruña.
