O Portal de contratos Públicos de Galicia publicou este 6 de xullo a licitación, por un importe de 405.570 euros, da concesión do servizo da escola infantil para o Hospital de Barbanza, que atende a nenos e nenas de 0 a 3 anos.
Este servizo busca facilitar a conciliación da vida persoal e laboral do persoal do hospital comarcal e do resto de familias que utilizan a escola.
Deste xeito, facilítase que as persoas beneficiarias exerzan a súa actividade profesional facendo compatible a paternidade e maternidade coa vida laboral.
Antes da finalización da vixencia da actual concesión, o Servizo Galego de Saúde abre a licitación deste contrato. Terá unha duración de 3 anos con posible prórroga máxima de 24 meses.
As empresas interesadas en participar neste procedemento teñen ata o vindeiro 27 de xullo para presentar as súas ofertas.
