A pasada fin de semana arrincou en Rianxo a nova edición do certame de murais urbanos Viladomar, organizado pola Asociación Ondiñas Mainas en colaboración co Concello e co apoio de entidades como a Deputación da Coruña. Segundo confirmaron dende a organización, os murais deste ano xa están collendo forma: concretamente tres propostas de Lula Goce, que está a realizar a súa intervención na Martela, de Agustina Shuan, que está intervindo nun inmóbel na Atalaia, e de Alejandro Mosquera, que está a traballar en Buhía.
A nova edición de Viladomar desenvolverase ata o vindeiro día 11. O festival, que cumpre xa sete anos de traxectoria, regresou cunha completa programación que converterá a vila nun espazo de encontro entre artistas e veciñanza, sumando ademais tres novas obras ao seu xa consolidado museo ao aire libre.
A iniciativa, impulsada pola Asociación Cultural Ondiñas Mainas en colaboración co Concello de Rianxo e a Deputación da Coruña, contará nesta ocasión coa participación de tres creadores de prestixio: Lula Goce, Agustina Shuan e Alejandro Mosquera.
As intervencións artísticas deste ano distribuíronse por diferentes puntos estratéxicos do termo municipal. Lula Goce é a encargada de actuar na Martela (Rúa Gudiños); Agustina Shuan plasma o seu traballo nun novo mural en Atalaia Asados; e Alejandro Mosquera intervén na Aldea de Buhía. Con estas incorporacións, o festival continúa ampliando o percorrido artístico que leva construíndo de xeito ininterrompido desde o ano 2018.
Como novidade conceptual, a identidade gráfica desta sétima edición atopa a súa inspiración nun petróglifo da contorna de Rianxo. Segundo apuntan desde a organización, o obxectivo é propor unha reflexión arredor dos símbolos e das pegadas que permanecen no tempo, establecendo unha ponte directa entre as primeiras formas de representación humana e o muralismo contemporáneo.
Un programa aberto á participación veciñal
Máis alá do propio traballo a pé de andamio, que a veciñanza e os visitantes poderán seguir en directo ao longo de todas as xornadas, o Viladomar deseñou unha axenda de actividades paralelas coa ollada posta na creación compartida.
Entre as propostas principais destaca a elaboración dun mural colaborativo que se desenvolverá en estreita colaboración coa asociación As Púrpuras. Así mesmo, o recoñecido artista Camilo Seira impartirá unha masterclass na que amosará de xeito práctico o proceso de creación dun mural vexetal elaborado con musgo.
O festival vivirá o seu broche de ouro o sábado 11 de xullo cunha intensa xornada de clausura organizada da man do colectivo Rock in Rian. Durante todo ese día, o público poderá participar en dous roteiros teatralizados para coñecer a historia dos murais da vila, gozar dun percorrido en barco pola ría e asistir a unha variada programación musical que servirá para despedir a edición ata o ano que vén. Desde a organización lembran que todos os horarios e localizacións detalladas das actividades poden consultarse a través das redes sociais de Viladomar.
