Esta fin de semana vaise celebrar un dos grandes acontecementos culturais e relixiosos da comarca do Barbanza no verán: a Romaría de Exipto (Festas na Honra da Virxe de Exipto), na parroquia boirense de Abanqueiro.
As celebracións comezarán o 31 de xullo, venres, e proseguirán ao longo de toda a fin de semana, ata o domingo 2 de agosto, cunha misa na honra de San Xosé o luns 3 de agosto para pechar as actividades relixiosas.
Esta festividade centenaria combina tradición, música e gastronomía e está organizada pola veciñanza de Exipto (a renovada Comisión de Festas) co apoio do Concello e da Deputación da Coruña.
O comezo oficial inclúe actividades interxeracionais coa asociación AGADEA a partir das 16:30 horas. Logo haberá actividades relixiosas como a subida dos santos da Igrexa de Abanqueiro á Igrexa de Exipto (ás 20h) e cunha misa pola Virxe de Exipto (ás 20.30 horas).
Pola noite (21:00 h), terá lugar o espectáculo familiar e de monicreques A maleta da mestra, a cargo de Raquel Queizás.
Ao remate da dita función haberá música con Malfinde, Belako, Mujeres e Rapariga DJ.
O sábado 1 comezará con actuacións de música tradicional con O Ar de Loureda e ARume e logo cunha misa na honra de San Antón, ás 12. Logo haberá unha festa da escuma e unha sesión vermú coa Orquestra Neverloura. Pola noite actuará Boa Vibra e haberá verbena con Dúo Charada e a Orquestra Platinum.
O domingo comezará cunha misa na honra da Virxe de Exipto, ás 9h. Logo volverá a música tradicional con O Ar de Loureda e Arume. A continuación comezará o mercado ecolóxico A Eira dos Oficios. Ás 10, ás 11 e ás 12 haberá misas na honra da Virxe de Exipto. A misa das 12 inclúe procesión e actuación do Grupo de Baile de Abanqueiro. Logo haberá unha romaría amenizada por O Ar de Loureda e Home Orquestra con xogos populares.
