O Concello de Boiro vén de adxudicar as obras para a mellora da eficiencia enerxética no Centro Social de Cures, unha actuación dun importe de 149.543,90 euros que conta co financiamento da Deputación da Coruña mediante o Plan de Obras e Servizos (POS+ Concellos).
As actuacións proxectadas teñen un prazo de execución de seis meses e contemplan o cambio de carpinterías para mellorar a eficiencia enerxética; así como o cambio da cuberta de fibrocemento existente por un illamento sobre forxado horizontal para a mellora da envolvente e falso teito con illamento.
Vaise levar a cabo a instalación dun sistema de ventilación con recuperador de calor e a substitución de luminarias existentes por unhas de tipo LED. Ademais, proxéctanse no marco deste proxecto actuacións para a impermeabilización da fachada e outras actuación interiores como o cambio de carpinterías ou o pintado de todas as estancias.
“Esta actuación busca unha reparación integral do centro para que se poida retomar nel o uso que tiña por parte da veciñanza de Cures” afirmou o alcalde, José Ramón Romero, que tamén anunciou que “esta actuación está enmarcada nun programa de renovación e acondicionamento dos distintos centros sociais e veciñais do municipio”.
