A Xunta avalía iniciativas para converter as algas de arribazón nun recurso industrial
A directora xeral de Desenvolvemento Pesqueiro, Ángeles V. Suárez, mantivo hoxe unha reunión de traballo con Elena Fontán Alende e Fátima Rodríguez Figueiras, responsables da firma galega Orixe Salgada. O obxectivo do encontro foi abordar as problemáticas e oportunidades que presentan as algas de arribazón no litoral galego.
Durante a xuntanza, a Consellería do Mar avaliou o impacto ambiental e económico que estes episodios teñen sobre o sector marisqueiro. O propósito é analizar estratexias conxuntas que permitan dar un xiro de 180 graos á xestión actual, pasando do concepto de “residuo” ao de “recurso de alto valor”.
Un modelo de biorrefinería con aval científico
No encontro presentouse o modelo técnico de Orixe Salgada, un proxecto de biorrefinería circular de residuo cero que conta con aval científico. A iniciativa está liderada por Elena Fontán, oceanógrafa e investigadora do programa DOMAR.
Este proxecto foi recoñecido co Premio Agader 2025 e seleccionado recentemente para os programas de aceleración estatal AgroBank Tech e Crecemos Juntas. Así mesmo, espertou o interese da Secretaría Xeral de Pesca pola súa escalabilidade ao conxunto do sector nacional.
Alianza pola Economía Azul e proxecto piloto de I+D
A directora xeral destacou o potencial desta proposta para xerar novas xanelas de emprego e diversificación no ámbito da Economía Azul, o que redundará na sustentabilidade e competitividade do sector marítimo-pesqueiro.
Como resultado, ambas partes puxeron sobre a mesa unha proposta de colaboración futura para o lanzamento dun proxecto piloto de I+D. Esta alianza estratéxica buscará:
- Executar probas de escalado industrial sobre o terreo.
- Estudar as trabas regulatorias estatais para integrar plenamente estes novos procesos bioeconómicos na contorna de Galicia.
