A programación de verán da Concellería de Turismo da Pobra do Caramiñal, baixo o lema Vive a experiencia, xa está en marcha e “faino cunha excelente resposta por parte do público”, segundo confirmou o Concello. A primeira das actividades, o Turismo Mariñeiro, celebrouse este martes 14 de xullo cunha moi boa acollida, confirmando o interese que esperta esta proposta, que permite achegarse de primeira man ao modo de vida e ás tradicións ligadas ao mar que forman parte da identidade pobrense.
Tras este exitoso inicio, a programación continúa esta fin de semana cunha completa oferta de experiencias para descubrir a riqueza natural, paisaxística e gastronómica da Pobra do Caramiñal.
Este venres 17 de xullo celebrarase a Ruta do Mexillón en embarcación tradicional, unha actividade que convida a navegar pola ría para coñecer o cultivo dun dos produtos máis representativos da nosa gastronomía. A experiencia inclúe, ademais, unha degustación de mexillón e viño da IXP Terra de Barbanza e Iria.
A programación continuará o sábado e o domingo cos Viaxes en Veleiro, unha oportunidade única para contemplar a costa pobrense desde o mar e gozar da navegación a vela nunha contorna privilexiada.
Como broche da fin de semana, o domingo terá lugar tamén unha das propostas máis especiais da tempada: a viaxe á illa de Sálvora, unha experiencia que permitirá descubrir un dos espazos máis emblemáticos do Parque Nacional Marítimo-Terrestre das Illas Atlánticas de Galicia e coñecer o seu patrimonio natural, histórico e paisaxístico.
Desde a Concellería de Turismo destacan a boa acollida das primeiras actividades e animan tanto á veciñanza como ás persoas que visitan a vila durante estes meses a participar nunha programación deseñada para vivir a Pobra do Caramiñal dunha maneira diferente, descubrindo o seu patrimonio mariñeiro, a súa gastronomía e os seus espazos naturais a través de experiencias únicas.
As persoas interesadas en participar nas distintas actividades poden realizar a súa inscrición na Oficina de Turismo da Pobra do Caramiñal, situada na Casa Mariñeira (Parque do Castelo), onde recibirán toda a información sobre as prazas dispoñibles e as condicións de participación.
Baixo o lema Vive a experiencia, a Concellería de Turismo continúa apostando por unha programación que pon en valor os recursos do municipio e consolida a Pobra do Caramiñal como un destino onde o mar, a natureza e a autenticidade son os grandes protagonistas.
