O Concello da Pobra do Caramiñal e a Comisión de Festas do Carme do Castelo presentaron a programación das Festas do Carme do Castelo 2026, que se celebrarán entre os días 16 e 19 de xullo cun amplo programa de actos que combinará tradición, música, cultura popular e actividades para todas as idades.
No acto participaron a concelleira de Cultura, Patricia Lojo; o presidente da Comisión de Festas do Carme do Castelo, José María Abuín; o tesoureiro, Ricardo Santa María; e os membros da comisión José Manuel Fariña, Lola Olveira e Raquel Hermo.
Durante a súa intervención, Patricia Lojo puxo en valor o traballo e a implicación da Comisión de Festas para facer posíbel unha nova edición desta celebración, así como a importancia de preservar unhas tradicións profundamente vencelladas á identidade mariñeira da Pobra do Caramiñal. A concelleira tamén animou á veciñanza e ás persoas visitantes a participar nunha cita que cada verán converte o barrio do Castelo nun espazo de encontro, convivencia e dinamización cultural.
Pola súa banda, os representantes da Comisión agradeceron a colaboración das persoas, entidades e empresas que colaboran coa organización destas festas e convidaron a toda a cidadanía a sumarse aos distintos actos programados.
As celebracións darán comezo o xoves 16 de xullo co tradicional lanzamento de bombas de palenque, ao que seguirá o disparo de bombas na honra da patroa. A xornada continuará coa música tradicional a cargo de Arrancadeira e As de Sempre, e rematará cun concerto da Banda de Música Ateneo Musical da Pobra no Cantón da Leña.
O venres 17 de xullo celebrarase a tradicional sardiñada e foliada na Covecha, antes dos concertos de Menestreis e Brumeigho, que terán lugar no adro da igrexa.
O sábado 18 desenvolverase a xornada máis intensa das festas, con alboradas polas parroquias, ruadas, música nas rúas, inchábeis con auga e festa da escuma para a cativada, ademais do concerto da Banda de Música Ateneo Musical da Pobra.
Pola noite celebrarase a décima edición do Festival Folk, coas actuacións de Rianxeiras da Covecha, Faíscas da Pontraga e A Requinta de Lampai, antes da sesión musical de DJ Jalaiko.
As festas concluirán o domingo 19 de xullo coa misa solemne na honra da Virxe do Carme na Igrexa Parroquial de Santiago do Deán e coa tradicional procesión marítima, acompañada por Arrancadeira e a Banda de Música de Padrón. Ao longo da xornada tamén haberá alboradas, ruadas e un concerto da Banda de Música de Padrón nos Xardíns de Valle-Inclán. Ademais, habilitaranse tres catamaráns para que as persoas interesadas poidan seguir desde o mar a procesión e a ofrenda floral en homenaxe a todas as persoas falecidas no mar.
O Concello da Pobra do Caramiñal e a Comisión de Festas convidan á veciñanza e ás persoas visitantes a achegarse ao barrio do Castelo para compartir catro días nos que a tradición mariñeira, a música e a cultura popular volverán converter esta celebración nunha das citas máis destacadas do calendario festivo da vila.
