O presidente da institución porteña, José María Vila Alén, visitou Barbanza para potenciar o legado do ilustre galeguista e anunciar a reactivación do histórico Centro Noia-Rianxo na Arxentina.
A memoria de Alfonso Daniel Rodríguez Castelao e a pegada indestructible da emigración foron o fío condutor dunha emotiva xornada institucional no Barbanza. O presidente do Centro Galicia de Bos Aires, José María Vila Alén, acompañado pola súa dona, Josefina Inés Lizzano, encabezou unha delegación que visitou Noia e Rianxo co obxectivo de reforzar os vínculos culturais e históricos que unen a Galicia territorial coa denominada “quinta provincia” en América.
A comitiva contou cunha destacada representación política e social, na que participaron Francisco López Franco “Chesqui”, coordinador nacional do Partido Galeguista; Ramón Aguíño, representante do partido en Bos Aires; o párroco de Rianxo e Boiro, Marcelino Sánchez; e membros da Asociación Etnográfica Alfonso Daniel Manuel Rodríguez Castelao, encabezados polo seu secretario, Xusto Ordóñez, e o vogal Ramón Dios.
Esta viaxe coincide nun momento de gran simbolismo, dado que o Centro Galicia de Bos Aires —propietario da obra mestra de Castelao, A derradeira lección do mestre— cedeu temporalmente este valioso lenzo ao Museo de Pontevedra para a súa exposición.
Noia e Rianxo recuperan a súa “casa” en Bos Aires
A axenda oficial arrincou no Concello de Noia, onde a delegación foi recibida polo alcalde, Fran Pérez. O encontro serviu para anunciar unha das grandes novas para a comunidade emigrante: a revitalización e posta en valor do histórico Centro Noia-Rianxo na capital arxentina.
Esta entidade, nada orixinariamente o 25 de maio de 1986 froito da fusión da Asociación del Partido Judicial de Noya e do Centro del Ayuntamiento de Rianjo, volve abrir as súas portas de xeito activo. “Os veciños de Noia e Rianxo volven ter unha casa de referencia e un espazo de fraternidade na cidade porteña”, salientaron durante a recepción.
Vila Alén tamén puxo en valor o traballo do propio Centro Galicia e do Instituto Arxentino-Galego Santiago Apóstol, un referente educativo no exterior dirixido por Carlos Xavier Rodríguez, onde uns 600 alumnos reciben formación oficial co galego como materia vehicular.
Na berce do galeguismo e da ‘Rianxeira’
Tras o paso por Noia, a comitiva desprazouse ata Rianxo, a vila natal de Castelao. Alí, os representantes da Asociación Etnográfica compartiron os seus proxectos para dignificar e espallar o legado do intelectual e da súa dona, Virxinia Pereira, unhas iniciativas que recibiron o aplauso e o firme respaldo do Centro Galicia e do Partido Galeguista.
A xornada tivo un dos seus momentos máis emotivos coa visita á emblemática Casa Feliciano, un establecemento fundamental para comprender a historia musical do país. Foi neste local onde se escoitaron por primeira vez en Galicia as dúas primeiras copias gravadas da Rianxeira (Ondiñas da nosa ría), composición creada en Bos Aires en 1947 por Anxo Romero Loxo e Xesús Frieiro Dourado “Pinciñas” precisamente como homenaxe a Castelao. O gramófono de Feliciano converteu o bar nun santuario inseparable da memoria da emigración.
A delegación arxentina continuará en Galicia ata o vindeiro 13 de xullo, data na que regresará a Bos Aires co compromiso renovado de seguir custodiando e defendendo a lingua e a cultura galega alén do Atlántico.
