A nova (e innovadora) residencia de maiores de Rianxo colle esta semana un novo impulso de cara a súa materialización. A Deputación da Coruña aprobará o vindeiro venres, no pleno ordinario correspondente ao mes de xullo, o convenio de cooperación co Concello de Rianxo para a construción da edificación e posta en funcionamento do servizo público Casa de Acompañamento a Persoas Maiores, a residencia que se levantará a carón do IES Félix Muriel.
Como lembraremos, o pasado mes de abril aprobouse cesión á Deputación da Coruña dunha parcela de titularidade municipal para a construción do devandito edificio. En paralelo, iniciouse o estudo xeotécnico previo á redacción do proxecto construtivo.
A residencia contará con unhas 59 prazas e caracterizarase, segundo fixeron saber o presidente provincial, Valentín González, e o alcalde rianxeiro, Julián Bustelo, “por fuxir do modelo actual apostando por un centro pequeno, integrado na plenamente no municipio e baseado na cogobernanza entre profesionais, persoas usuarias e familias”.
“Con este importantísimo investimento e grazas á colaboración entre administracións”, engadiu o rexedor, “dáselle resposta a unha vella demanda do noso municipio e do conxunto da comarca do Barbanza”. Apuntou tamén que “grazas a esa colaboración, á residencia axiña sumarase o centro de día que tanto tempo levamos agardando e que se habilitará no Pazo de Rianxiño”.
A residencia estará formada por pequenos fogares nos que os as persoas residentes disporán de habitacións amplas con espazos abertos, zona de cociña, salón, baño propio, acceso a zonas exteriores e a posibilidade de personalizar a decoración, para favorecer a identidade e a intimidade de cada persoa usuaria.
Ademais, a atención sociosanitaria será integral e adaptada ás necesidades de cada persoa, “grazas a un equipo estábel e especializado de profesionais que traballará directamente con cada unidade de convivencia, nunha proporción que permitirá coñecer ben ás persoas atendidas e prestarlles unha atención próxima e de calidade, minimizando a rotación de persoal e garantindo a continuidade do coidado”, confirmou o alcalde de Rianxo, Julián Bustelo, quen manifestou o seu agradecemento á Deputación da Coruña e ao seu presidente, Valentín González Formoso, “pola súa aposta decidida por Rianxo”. E engadiu: “O traballo conxunto entre as administracións resulta imprescindíbel para acadar retos desta magnitude”.
A nova residencia (Casa de Acompañamento aos Maiores) estará emprazada a carón do IES Félix Muriel e vén cuns 8.000 metros cadrados, dos cales 5.300 son edificábeis.
A residencia de Rianxo é un dos tres centros que integran o novo modelo público de atención ás persoas maiores impulsado pola Deputación, que aposta por “infraestruturas pequenas, humanas e integradas na comunidade”, sinalaron os responsábeis da institución.
O presidente da Deputación, Valentín González Formoso, destacou recentemente que as CAM “rompen cos modelos tradicionais de residencias e poñen no centro ás persoas. Non queremos construír almacéns, senón fogares. Apostamos por un modelo máis humano, máis próximo e máis digno, que permita ás persoas maiores vivir nun entorno familiar, conservando os seus vínculos afectivos e a súa autonomía”, afirmou, engadindo que este proxecto “nace como experiencia piloto que pode servir de referencia para outras administracións con competencia nesta materia”.
Como dixemos, o proxecto da CAM de Rianxo desenvolverase nunha parcela de 8.000 metros cadrados, dos cales 5.300 serán edificábeis. O edificio organizarase en catro unidades convivenciais que, en conxunto, ofrecerán 59 prazas. As unidades contarán con cociña salón e espazos comúns que reproducen o ambiente dun fogar, evitando a estrutura institucional e hospitalaria dos centros tradicionais, ademais a accesibilidade e a integración co entorno serán elementos fundamentais do deseño, que incluirá xardíns, horta, zonas de convivencia e espazos abertos para a relación coas familias e coa comunidade.
Entre os servizos previstos figuran atención médica xeriátrica, psicoloxía, traballo social, terapia ocupacional e fisioterapia, ademais de programas de estimulación cognitiva e actividade física. O centro incorporará tecnoloxía avanzada, con sensores de confort ambiental, sistemas de prevención de caídas, telemedicina e dispositivos intelixentes que mellorarán a seguridade e a personalización dos coidados.
A iniciativa forma parte do plan provincial da Deputación da Coruña para crear tres Casas de Acompañamento nas Pontes, Ordes e Rianxo, inspiradas nos modelos europeos de quinta xeración implantados en países como Dinamarca, Suecia ou os Países Baixos. Estes centros, máis pequenos e de proximidade, buscan evitar o desarraigo das persoas maiores e favorecer a súa integración na vida comunitaria.
