A Asemblea Intercomarcal de Mulleres do BNG Barbanza–Muros Noia organizou este domingo 13 de xullo pola mañá unha caravana patriótica que partiu ás 11.30 horas desde A Pobra do Caramiñal con destino ao miradoiro da Curota, dentro da programación de actividades previas ao Día da Patria Galega, que se celebra o vindeiro 25 de xullo.
No cumio do miradoiro da Curota, as participantes despregaron un gran bandeirón da patria galega e deron lectura ao manifesto, co obxectivo de contribuír á popularización da bandeira galega como símbolo de orgullo e identidade.
Durante o acto, as responsábeis da organización fixeron un chamamento á cidadanía para pendurar con orgullo a bandeira galega nas casas, balcóns e
espazos públicos. “É a bandeira que nos une e na que nos recoñecemos, a que levamos no corazón as galegas e os galegos que sentimos o noso país con
orgullo, a que reflicte a nosa identidade e a que nos acompaña en todas as loitas”, sinalaron.
No manifesto lembraron que a bandeira galega “é a memoria dos nosos avós e das nosas avoas, das mariscadoras, das mulleres que labraron a terra, das obreiras que loitaron nas fábricas, das que falaron e escribiron en galego mesmo cando estaba prohibido, das veciñas que se organizaron para plantar cara á
inxustiza e ao desleixo e tamén das que tiveron que marchar na procura dunha vida mellor, levando sempre Galicia consigo”. Un símbolo que, engadiron, “é tamén a bandeira da mocidade, da clase traballadora e da diversidade do noso país”.
As representantes nacionalistas animaron á cidadanía a participar activamente na celebración do Día da Patria Galega e, especialmente, na manifestación
nacional que terá lugar o vindeiro 25 de xullo en Santiago de Compostela.
A xornada desenvolveuse nun ambiente festivo e de confraternidade, rematando cunha foliada popular que puxo o broche final a unha iniciativa que reuniu numerosas persoas que reafirmaron o seu compromiso pola defensa do país.
