O Concello de Rianxo sumouse ás reivindicacións do persoal de Froiz e de Gadis. O pleno da Corporación aprobou na pasada sesión ordinaria unha moción presentada polo BNG en apoio ás traballadoras do comercio de alimentación da nosa provincia. Na moción acórdase o total apoio da Administración rianxeira e dos seus grupos ás traballadoras e traballadores de Froiz e Gadis “na defensa dos seus dereitos laborais e na súa convocatoria de folga na provincia da Coruña”.
Lembran que as reivindicacións do persoal de ambas compañías expoñen “unha clara necesidade de establecer canles para unha negociación efectiva, con vontade de acordo, onde se aborden cuestións fundamentais como a mellora das condicións de traballo e dos salarios, a estabilidade no emprego, o impulso da conciliación e a óptima organización dos tempos laborais”.
Dende o Concello de Rianxo saliéntase “a relevancia de acadar unhas condicións laborais dignas para as persoas traballadoras do sector da alimentación, acordes co esforzo, responsabilidade e contribución esencial que realizan para a sociedade en xeral e Froiz e Gadis en particular”.
Ao mesmo tempo, tamén se fai un chamamento ao diálogo e entendemento, co foco posto en avanzar na procura dunha solución ao conflito actual.
