Ribeira volveu converterse este sábado en porto de saída da Traslatio, acollendo a cuadraxésima edición desta emblemática conmemoración xacobea catorce anos despois da súa última participación como punto de partida.
O evento, promovido pola Fundación Ruta Xacobea do Mar de Arousa e Ulla, recrea a viaxe do corpo do Apóstolo Santiago dende Palestina ata Galicia, considerada a orixe do fenómeno da peregrinación e o primeiro dos Camiños.
O acto institucional desenvolveuse na lonxa de Ribeira, onde a concelleira de Turismo e Cultura, Ana Barreiro, destacou a “honra” de que o municipio fose elixido como porto anfitrión. A edil puxo en valor a estreita vinculación da localidade co mar, subliñando que “a nosa terra non se entende sen o mar”, tanto polo seu peso económico como polo seu significado cultural, tradicional e identitario.
Barreiro tamén incidiu na relevancia da Traslatio desde múltiples perspectivas, salientando o seu valor cultural, paisaxístico, turístico e ambiental, ao tempo que permite aos participantes coñecer a riqueza natural da ría de Arousa e do río Ulla. Neste sentido, lembrou que esta ruta constitúe unha das variantes do Camiño Portugués escollida por numerosos peregrinos.
Tras o acto, un catamarán partiu do porto de Ribeira para sumarse ao resto de embarcacións procedentes doutros puntos da ría, conformando unha frota duns 500 peregrinos. A travesía discorreu polas augas de Arousa para remontar posteriormente o río Ulla ata Padrón-Pontecesures, onde tivo lugar a tradicional bendición das embarcacións.
O Concello de Ribeira forma parte da Fundación Ruta Xacobea do Mar de Arousa e Ulla dende 1999 e conta en Bandourrío cun dos 17 cruceiros que integran este singular vía crucis marítimo-fluvial.
