O delegado do Goberno en Galicia, Pedro Blanco, mantivo este luns 29 de xuño unha reunión coa alcaldesa de Ribeira, María Sampedro, para analizar a situación da seguridade no municipio e abordar as principais cuestións relacionadas coa coordinación entre administracións. Durante o encontro celebrado en Santiago, ambos coincidiron en destacar “a importancia da colaboración permanente entre o Goberno de España e a Administración local de Ribeira” para ofrecer unha resposta eficaz ás necesidades do concello e seguir mellorando a protección da veciñanza.
Pedro Blanco trasladou “unha mensaxe de confianza á cidadanía” e asegurou que “Ribeira é unha localidade segura, grazas tamén ao labor diario das Forzas e Corpos de Seguridade do Estado”. Nese senso, reafirmou o compromiso do Goberno de “continuar traballando da man do Concello para manter os actuais niveis de seguridade e dar resposta aos novos retos que poidan xurdir”.
Ao remate do encontro, Pedro Blanco e María Sampedro quedaron emprazados a manter unha nova xuntanza nas próximas semanas en Ribeira, coincidindo coa visita do delegado ás instalacións da comisaría da Policía Nacional.
