Nesta mañá do xoves, 18 de xuño, daba comezo unha nova edición dos Obradoiros contra a desinformación desenvolvidos en nove localidades da provincia da Coruña polo Colexio Profesional de Xornalistas de Galicia, coa colaboración da área de Dereitos Civís da Deputación da Coruña.
Máis polo miúdo, o xornalista Miguel Rodríguez Fernández impartía dous obradoiros (realizados ás 9:15 e ás 10:05 horas) contra a desinformación ao alumnado de 1º e 2º de ESO do IES Poeta Añón de Outes, cos que se dá por inaugurada unha nova etapa do programa de alfabetización mediática nos centros de ensino medio da provincia da Coruña. A sesión inaugural contou coa presentación de Belén Regueira Leal, decana do Colexio Profesional de Xornalistas de Galicia, e Soledad Agra Tuñas, deputada da Área de Dereitos Civís da Deputación da Coruña.
Miguel Rodríguez traballou cinco anos en La Opinión A Coruña e foi xornalista de datos na axencia de noticias Press Association no Reino Unido; desde 2019 é editor de Datos en ICIS, ademais de colaborar con medios elDiario.es, La Voz de Galicia, Naiz ou Tempos Novos. Como o resto dos profesionais colexiados e colexiadas que impartirán os obradoiros, recibiu formación específica en alfabetización mediática para trasladar á rapazada coñecementos e ferramentas para loitar contra a desinformación.
Dende o Colexio de Xornalistas queren facer fronte ao aumento da desinformación ou a confusión entre o que é e non é un medio na contorna dixital, feitos que están a danar profundamente o xornalismo, que se enfronta a unha crise e un descrédito sen precedentes. Para combater esta nova corrente de desinformación xorde este programa de formación en alfabetización mediática. O obxectivo é fornecer a toda a sociedade galega de coñecementos contra as mentiras e ferramentas para combatelas. No caso das e dos escolares de secundaria, a través de xogos, historias e exemplos próximos a eles, poden coñecer as diferenzas entre a información errónea e a desinformación, preguntarse quen e por que ten interese en enganarnos, coñecer as estratexias de espallamento das loiadas ou converterse eles mesmos en fact checkers.
Esta nova etapa dos obradoiros na Coruña vén a complementar os realizados no ano 2025, que levaron o programa de alfabetización mediática do Colexio Profesional de Xornalistas de Galicia ao alumnado de: Arzúa, Brión, Carral, Curtis, Melide, Oroso, Padrón, Santa Comba e Zas. Todos os obradoiros estarán impartido por profesionais colexiados e colexiadas, que recibiron formación específica en alfabetización mediática. En concreto, as e os xornalistas que descubrirán ao alumnado da Coruña as estratexias de quen propaga novas falsas e os recursos para contrastar información serán: María del Carmen Abuín González, Elena Martín Lores, Carmen Quintela Babío, María Selina Otero Verdes, Miguel Rodríguez Fernández, María del Pilar Rodríguez Losada e Marga Tojo González.
