A Asociación de Empresarios pon en marcha, en colaboración con ÁGAPE (Asociación Galega de Acompañamento Persoal e Educativo), unha iniciativa destinada a fomentar a inclusión e a accesibilidade no comercio local mediante a colocación de pictogramas identificativos nos escaparates dos establecementos asociados.
Esta acción permitirá que persoas con neurodiverxencias, especialmente aquelas dentro do Trastorno do Espectro Autista (TEA), poidan identificar con maior facilidade os distintos negocios, favorecendo a súa orientación, autonomía e participación na vida cotiá.
Con esta campaña, a Asociación de Empresarios reforza o seu compromiso “cun modelo de comercio próximo, sen barreiras e comprometido coas necesidades de toda a cidadanía”.
Pola súa banda, ÁGAPE achega a súa experiencia no ámbito da inclusión social, a atención ás persoas con neurodiverxencias e o acompañamento ás familias.
“Todos os nosos asociados poderán solicitar gratuitamente estes pictogramas a través da Asociación de Empresarios e sumarse así a unha iniciativa que contribúe a construír unha contorna máis amábel, accesible e inclusiva”, sinalou o presidente da AER, Francisco Martínez Gude.
Desde ambas as entidades anímase ao tecido empresarial local a participar neste proxecto, “demostrando que pequenos xestos poden xerar grandes cambios e axudar a construír unha comunidade onde ninguén quede atrás”.
