O concello de Rianxo recibiu este luns 22 de xuño a visita do secretario de Estado de Infancia e Xuventude, Rubén Pérez Correa, acompañado do subdelegado do Goberno na Coruña, Julio Abalde, que foron recibidos polo alcalde Julián Bustelo e polo concelleiro Julio Alcalde, xunto con outros membros do Goberno local. Xuntos visitaron a Unidade de Atención Temperá do Concello de Rianxo, un servizo que conta con financiamento da Consellería de Política Social e Igualdade da Xunta de Galicia e que ten como obxectivo fundamental dar resposta ás necesidades transitorias ou permanentes que presentan os nenos e as nenas de 0 a 6 anos con trastornos no desenvolvemento co obxectivo de facilitar o desenvolvemento da súa autonomía persoal.
Os representantes do Concello tamén debateron con secretario de Estado arredor dos prexuízos derivados dun uso abusivo e non supervisado e controlado das pantallas e dos dispositivos electrónicos nos cativos e nas cativas de menor idade. O secretario de Estado lembrou que a Lei para a protección das persoas menores de idade nos entornos dixitais que o Goberno de España pretende aprobar no outono preséntase como “un elemento fundamental para regular os espazos dixitais e garantir que sexan seguros para a infancia”.
A estadía en Rianxo de Rubén Pérez e Julio Abalde tamén incluíu unha visita ao proxecto Máis Ca Leña da CMVMC O Fieitoso de Taragoña e o CEP Brea Segade. Un proxecto educativo e medioambiental que xira arredor da figura do monte veciñal e os seus usos formando aos comuneiros e ás comuneiras de mañá.
