O Concello de Boiro recibiu da Consellería de Economía e Industria unha subvención por importe de 112.503,23 euros para a mellora de infraestruturas no Parque Empresarial de Espiñeira. En concreto vaise acometer unha actuación de 140.629,04 euros para a mellora da infraestrutura viaria.
As actuacións que se pretenden levar a cabo son para dar continuidade coa mellora das infraestruturas viarias que se veñen levando a cabo cada ano en varios tramos. En particular vaise realizar o asfaltado da estrada da fase I do polígono, así como o pintado do firme.
A vía obxecto deste proxecto constitúe o eixo principal de circulación e acceso ás naves e parcelas do polígono, soportando tráfico frecuente e vehículos pesados que, na actualidade, presenta unha degradación significativa tanto do firme coo da sinalización.
O Parque Empresarial de Espiñeira conta cunha superficie de 324.500 metros cadrados que iniciou o seu funcionamento en 1998 coa primeira fase e en 2009 a segunda. Na actualidade o 90% das súas parcelas están ocupadas cunhas cincuenta empresas.
