O Concello da Pobra do Caramiñal informa de que o vindeiro luns 22 permanecerá cortada ao tráfico a estrada dos Areos, no tramo que dá acceso á zona comercial na que se atopan os supermercados, debido aos traballos de pavimentación que se levarán a cabo nesta vía.
A actuación desenvolverase entre as 7.00 e as 19.00 horas, polo que durante esa xornada non será posible circular por este tramo da estrada.
Co obxectivo de garantir a mobilidade e minimizar as incidencias no tráfico, os accesos alternativos realizaranse pola zona de Venecia e pola parte posterior de Boomerang. Tanto a circulación como o acceso aos aparcadoiros e aos establecementos comerciais da contorna deberán efectuarse por estas vías alternativas mentres duren os traballos.
Esta actuación permitirá mellorar o estado do firme e as condicións de circulación nunha zona que rexistra unha importante afluencia de vehículos ao longo de todo o ano.
Os traballos forman parte das actuacións de mellora das infraestruturas viarias promovidas polo Concello da Pobra do Caramiñal co financiamento da Deputación da Coruña.
Desde o Concello da Pobra do Caramiñal agradécese a comprensión e colaboración da veciñanza e das persoas usuarias da zona e pídeselles desculpas polas molestias que estas obras poidan ocasionar, lembrando que se trata dunha actuación necesaria para seguir mellorando os viarios municipais.
