O alcalde, José Ramón Romero, e demais membros do Goberno local, estiveron esta semana na parroquia do Castro no marco dos encontros veciñais Un café co alcalde que se celebrou en dúas sesións, nos lugares de Esteiro e Cabo de Cruz.
Durante os encontros o alcalde e demais membros do goberno tomaron nota das principais demandas e suxestións formuladas pola veciñanza, deron resposta a aquelas cuestións formuladas. Ademais, explicaron as principais actuacións que se están a levar a cabo e aquelas outras que están en previsión de executarse.
Entre os proxectos máis destacados o alcalde puxo en valor a rehabilitación da Casa do Mar de Cabo de Cruz, un inmóbel no que se está actuando mediante unha subvención de fondos europeos para a súa adaptación a museo da conserva; e tamén as reparacións no Centro Social de Cabo de Cruz, que está a primeira fase das obras para a reparación da cuberta en fase de licitación.
Estes encontros teñen como finalidade ter un contacto máis directo coa veciñanza e darlles a oportunidade de que trasladen as súas peticións e demandas sen necesidade de ter que desprazarse ao Concello, complementando así as xuntanzas particulares que se manteñen con todos aqueles veciños que así o solicitan.
O último dos encontros desta volta será na parroquia de Lampón.
