A décima edición do programa de democratización da educación superior da Universidade de Santiago de Compostela (USC) Camiños de Coñecemento e Experiencia chegou ao seu remate co acto académico realizado no salón nobre do Colexio de Fonseca (USC), en Santiago, no que, ademais da entrega de diplomas, houbo concerto de música explicada do grupo de música antiga Catro Quince.
Máis de medio cento de veciños e veciñas maiores de 50 anos de Ribeira participaron neste proxecto que, nesta convocatoria, lles permitiu formarse en patrimonio, fotografía e contorna dixital. Nesa xornada de clausura acompañounos a concelleira de Cultura, Ana Barreiro, quen destacou este tipo de iniciativas “que posibilitan estar en constante aprendizaxe e actualización polas temáticas a impartir”.
