O Concello da Pobra do Caramiñal celebrou os días 1 e 9 de xuño dúas sesións informativas sobre o Premio Emprende-Co Pobra, unha iniciativa municipal de apoio ao emprendemento e á dinamización do comercio local impulsada pola área de Promoción Económica co respaldo da Deputación da Coruña.
As convocatorias, desenvolvidas no Coworking Pobra, reuniron a máis de 30 participantes procedentes da Pobra do Caramiñal, Boiro, Rianxo e Ribeira, o que, en palabras do Concello da Pobra, “evidencia o interese que está a espertar esta proposta en toda a comarca do Barbanza”.
Nas sesións participaron a concelleira de Promoción Económica, Amparo Cerecedo; a técnica municipal Sara Sánchez; e Fátima Rodríguez, responsábel da asistencia técnica do Coworking Pobra. Tras as intervencións, habilitouse un espazo para a resolución de dúbidas no que as persoas asistentes puideron coñecer con detalle todos os aspectos da convocatoria. Como peche da xornada, Sara Sánchez guiou un percorrido pola vila para dar a coñecer distintas áreas comerciais e algúns dos locais que poderán formar parte do premio.
De xeito paralelo o Concello anunciou que traballa xa na creación dunha bolsa de locais comerciais baleiros en colaboración con persoas propietarias e inmobiliarias do municipio. O obxectivo é dispoñer dunha relación de espazos que permita asignar a cada unha das dúas iniciativas gañadoras o establecemento que mellor se adapte ás características e necesidades do seu proxecto.
As participantes valoraron de xeito positivo a iniciativa. Unha delas destacou que se trata de “unha oportunidade moi boa para quen queira emprender na nosa vila” e subliñou especialmente a importancia do acompañamento profesional durante o proceso: “Valoro sobre todo, ademais do local e da achega económica para os primeiros gastos, que exista un servizo de asesoramento, que haxa persoas expertas que nos acompañen no camiño de emprender, porque moitas veces facelo soa e por primeira vez asusta, e contar con ese apoio achega moita tranquilidade”.
A concelleira de Promoción Económica, Amparo Cerecedo, amosouse moi satisfeita coa acollida da iniciativa: “A repercusión que está a ter o proxecto, non só na Pobra senón tamén en toda a comarca e noutras zonas próximas, está a superar as nosas expectativas. Agardamos publicar as bases reguladoras moi pronto. Mentres tanto, é fundamental que as persoas interesadas vaian preparando as súas propostas. Ademais, quen o desexe poderá contar co acompañamento do Coworking Pobra. De feito, nos últimos días incorporáronse catro novas persoas para traballar no seu plan de negocio e na viabilidade das súas ideas empresariais”.
Máis de 60 entidades colaboran na difusión
Co obxectivo de dar a coñecer a iniciativa, o Concello está a contactar con máis de 60 entidades da comarca, administracións locais da contorna e organizacións de ámbito provincial e autonómico. Entre elas atópanse entidades vinculadas ao emprendemento e ao comercio, centros de formación profesional, cámaras de comercio, asociacións empresariais, colectivos de persoas autónomas e cooperativas, a Rede Provincial de Coworkings da Deputación da Coruña, os Polos de Emprendemento da Xunta de Galicia e grupos de desenvolvemento rural, entre outras.
Que ofrece o Premio Emprende-Co Pobra
As dúas iniciativas gañadoras recibirán un paquete integral de apoio para poñer en marcha o seu negocio comercial na Pobra do Caramiñal:
• Cesión gratuíta dun local comercial no centro da vila durante un período de entre 6 e 12 meses.
• Dotación económica de 10.000 euros para afrontar os custos iniciais da actividade.
• Asesoramento individualizado en emprendemento e comercio durante entre 6 e 12 meses.
• Incorporación á rede comercial local, con acceso ás campañas de promoción e dinamización conxunta.
Poderá presentar solicitude calquera persoa física ou xurídica que desexe abrir un establecemento comercial na Pobra do Caramiñal, incluídas persoas autónomas, microempresas, pemes e iniciativas de economía social.
O prazo de presentación abrirase proximamente
A publicación das bases reguladoras e a apertura do prazo para concorrer ao premio están previstas para as próximas semanas. Unha vez aprobadas, as persoas interesadas disporán de 15 días para formalizar a súa solicitude, polo que se recomenda preparar con antelación a documentación necesaria.
