O Concello de Rianxo, a través do seu alcalde Julián Bustelo, informou do comezo das obras de rehabilitación do Museo do Mar.
A actuación, licitada pola Mancomunidade Barbanza Arousa, forma parte da execución do Plan de Sostibilidade Turística Barbanza Arousa, no marco do Plan de Recuperación, Transformación e Resiliencia financiado pola Unión Europea – Nextgeneration UE e conta cun orzamento de 250.000€.
O rexedor sinalou que “a sociedade rianxeira cambiou moito nos últimos anos, mais a nosa identidade segue sendo netamente mariñeira. O noso Museo do Mar está chamado a ser un referente na transmisión ás xeracións futuras da nosa cultura e da nosa historia, unha historia na que o mar foi determinante”.
Bustelo destacou a importancia das obras que se están a desenvolver “nun museo que recibe cada ano centos de visitantes e no que non se volveu a intervir dende a súa apertura fai máis de 20 anos”.
Como lembraremos, o Museo do Mar sitúase nun edificio histórico da vila rianxeira, a Casa do Coxo. Consta de tres andares (soto, baixo e primeiro andar) nos que se abordan a actividade extractiva, as embarcacións tradicionais no seu quefacer socioeconómico e a construción das mesmas. No primeiro andar sitúase unha sala dedicada á recreación de embarcacións a través de maquetas, como era o seu proceso construtivo, o deseño, as ferramentas que empregaban e os distintos sistemas de propulsión. Acolle tamén este primeiro andar unha pequena biblioteca temática sobre o mar e a cultura marítima tradicional. O baixo acolle unha sala expositiva que achega a realidade do mar como camiño de comunicación. O soto recrea un taller tradicional de pequenas embarcacións.
O Museo do Mar, ademais da visita independente no seu horario de funcionamento, atende visitas guiadas e auto-guiadas, tanto para grupos organizados como para escolares ou visitantes individuais.
