O grupo municipal de Compromiso Outes (CO) denunciou a decisión do goberno local de renunciar ao proxecto da bancada da Casa da Cultura, unha actuación que contaba cunha subvención da Xunta de Galicia que financiaba o 70 % do investimento e que estaba prevista en terreos de titularidade pública.
A portavoz da formación, Alba Quintela, criticou que o executivo municipal, integrado polo PP e o concelleiro tránsfuga, optase por solicitar un préstamo á Xunta para adquirir dúas parcelas privadas na avenida de San Campio, onde prevé construír unha nova praza e un aparcadoiro.
Segundo explicou Compromiso Outes, a cuestión foi abordada no último pleno ordinario, no que o grupo da oposición pediu explicacións sobre unha decisión que considera prexudicial para as arcas municipais.
“Resulta inexplicable que o goberno descarte un proxecto que xa tiña o financiamento maioritario garantido e que non requiría investir na compra de solo, para preferir endebedar ao Concello cun crédito destinado á adquisición de terreos privados”, afirmou Alba Quintela.
A formación sostén que esta decisión evidencia unha falta de planificación e de criterio á hora de establecer prioridades para o municipio. Neste sentido, sinala que, ano e medio despois da moción de censura, continúan pendentes actuacións consideradas estratéxicas.
Como exemplo, Compromiso Outes cita a situación da praza do Concello, que continúa pechada ao público e sen rematar, unha circunstancia que atribúe á incapacidade do executivo para concluír as obras e poñelas a disposición da veciñanza.
