O Concello de Rianxo confirmou o inicio das obras da segunda fase do proxecto para o cambio das luminarias do paseo marítimo. Nas vindeiras semanas substituiranse as lámpadas do tramo comprendido entre A Carballeira e a praia do Pazo instalando unhas luminarias de maior eficiencia enerxética que empregarán tecnoloxía LED. Para estes traballos cóntase cun investimento de 40.000 euros.
Neste momento está tamén en licitación a terceira e última fase do proxecto, o que nos permitirá cambiar tamén o tramo comprendido entre a praia do Pazo e a praia da Torre antes de que chegue o inverno.
Ademais, o Concello aprobou dous proxectos para comezar o antes posíbel co cambio de firme de toda a zona que na actualidade está empedrada. Estes dous proxectos suman un investimento total de 457.024,26 euros.
Como lembraremos, na primeira fase renovouse o tramo comprendido entre Setefogas e A Carballeira instalando luminarias de maior eficiencia enerxética.
