En Boiro están collendo corpo estes días os Encontros en Lab Barbanza/ Experiencias Boviño, impulsados polo hostaleiro local e dinamizador cultural Suso Santamaría, que rexenta a histórica sala A Pousada da Galiza Imaxinaria.
A cita, que se vai presentar nos seus detalles este mércores 10 de xuño no Consistorio ás 13.00 horas, será a nova edición dun punto de reunión de profesionais da hostalería e o turismo que xira arredor do viño de quilómetro cero e ás IXP da Coruña (Terras de Barbanza e Iria e Terra de Betanzos).
Celebrarase o 15 de xuño no Lab Barbanza e estará coordinada, moderada e dirixida polo presidente da asociación de sumilleres galegos (AGASU) Juanjo Figueroa Treus, organizada polo Concello de Boiro e financiada pola Deputación da Coruña.
Contará cun aforo máximo de 100 persoas e dará comezo ás 10.30 horas coa recepción e a benvida, estando programada a apertura institucional para as 11.00 horas, para logo dar paso á charla Do mar á terra e da terra á mesa: Innovación biotecnolóxica para a viticultura a cargo de Elena Fontán, responsábel de Orixe Salgada, proxecto incubado no Viveiro de empresas do Lab Barbanza.
Logo haberá unha presentación de adegas con catas de viños e en formato storytelling (presentación da adega, a súa historia, filosofía e viños).
Ás 13.15 está prevista a presentación do segundo grupo de adegas e cata dos seus viños e ás 14.30 comezará o relatorio Como e por que potenciar, apoiar e comercializar o viño Km 0, a cargo de Fernando Mayoral, nomeado Mellor Sumiller de España 2024. Logo do networking e a maridaxe prevista para as 15.00 h (con degustación conxunta de todos os viños participantes e cunha escolma de produtos gastronómicos de proximidade do territorio) será a quenda das conclusións da xornada e clausura oficial.
