O Barbanza é xa este mes de xuño un fervedoiro de celebracións, moitas delas co engadido extra de reivindicar o pasado e a tradición e achegar un punto de renovación e de contacto directo coas novas xeracións. É o caso da Muiñada de Bealo, que se celebra este domingo 7 de xuño a partir das 17.00 horas. O programa inclúe un faladoiro, unha proxección audiovisual, un roteiro e unha visita ao muíño e actuacións musicais (Nunca é Tarde e Misto e Ghasolino DJs). Tamén haberá unha exposición con fotos antigas da parroquia e da contorna e apeiros tradicionais de labranza e de traballos no mar. Ademais, haberá unha merenda popular co que traian as persoas asistentes. Organiza a veciñanza de Bealo en colaboración co Concello de Boiro.
