A Mancomunidade Barbanza Arousa celebrou este xoves 11 en Madrid unha presentación de destino dirixida a profesionais do sector turístico co obxectivo de dar a coñecer os principais atractivos deste territorio galego como proposta diferenciada para os viaxeiros que buscan experiencias auténticas, sostíbeis e de calidade.
O acto contou coa participación do presidente da Mancomunidade Barbanza Arousa e alcalde da Pobra, José Carlos Vidal Suárez, acompañado polos alcaldes dos municipios que integran a entidade: María Sampedro (Ribeira), José Ramón Romero (Boiro) e Julián Bustelo (Rianxo), así como pola súa xerente, Fátima Cachafeiro. En total, asistiron ao redor de 30 representantes de axencias de viaxes interesadas en coñecer de primeira man a oferta turística da comarca así como os paquetes turísticos que se crearon ao redor da mesma.
Durante a súa intervención, o presidente destacou os valores que converten a Barbanza Arousa nun destino singular dentro de Galicia e do norte de España. Neste sentido, puxo en valor a riqueza paisaxística e natural do territorio, a conexión entre mar e montaña, así como a posibilidade de gozar de experiencias afastadas da masificación, onde predominan a tranquilidade, o descanso, a desconexión e a autenticidade.
Así mesmo, a gastronomía ocupou un lugar destacado na presentación. O presidente subliñou a calidade excepcional dos produtos do mar que caracterizan á ría de Arousa, así como a importancia da tradición pesqueira, marisqueira e conserveira na identidade da comarca. Do mesmo xeito, puxo de relevo o crecente interese que esperta a oferta enoturística do territorio e a excelencia dos seus viños.
Tras a presentación do destino, as persoas asistentes participaron nunha cata comentada de viños da Indicación Xeográfica Protexida Terras do Barbanza e Iria, unha oportunidade para achegarse á singularidade duns viños que reflicten as características únicas do territorio e a súa estreita vinculación coa paisaxe atlántica.
A xornada concluíu cun cóctel promocional no que os participantes puideron seguir descubrindo os sabores e produtos que distinguen a Barbanza Arousa, favorecendo ademais o intercambio de impresións e o establecemento de novas oportunidades de colaboración entre o destino e os profesionais turísticos asistentes.
Con esta acción promocional, a Mancomunidade Barbanza Arousa reforza a súa estratexia de posicionamento en mercados nacionais prioritarios, “apostando por un modelo turístico baseado na calidade, a sustentabilidade e a posta en valor dos recursos naturais, culturais, gastronómicos e enolóxicos que definen a identidade da comarca”.
Esta iniciativa foi posíbel grazas ao convenio de colaboración subscribido entre a Mancomunidade Barbanza Arousa e a Axencia Turismo de Galicia, no marco das accións de promoción turística impulsadas para fortalecer a visibilidade do destino en mercados estratéxicos e contribuír á comercialización da oferta turística do territorio. A colaboración entre ambas as entidades permite desenvolver actuacións orientadas a incrementar o coñecemento de Barbanza Arousa entre os profesionais do sector e potenciar o seu posicionamento como un dos destinos máis singulares de Galicia.
Barbanza Arousa continúa así traballando para consolidarse como un destino de referencia para aqueles viaxeiros que buscan experiencias xenuínas, contacto coa natureza, unha gastronomía de excelencia e a posibilidade de descubrir a Galicia máis auténtica.
