O Concello de Rianxo confirmou que as obras da segunda fase do proxecto para o cambio das luminarias do paseo marítimo avanzan “a bo ritmo”. Estes traballos encádranse no programa local de melloras nos paseos litorais e que inclúen a instalación de novas luminarias do paseo marítimo no tramo comprendido entre A Carballeira e a praia do Pazo.
“Nos vindeiros días adxudicaremos a terceira e última fase do proxecto, o que nos permitirá cambiar tamén o tramo comprendido entre a praia do Pazo e a praia da Torre antes de que chegue o inverno”, informou o alcalde Julián Bustelo, engadindo que xa foron aprobados dous proxectos para comezar “o antes posíbel co cambio de firme de toda a zona que na actualidade está empedrada”.
Estes dous proxectos suman un investimento total de 457.024,26€.
Como lembraremos, na primeira fase renovouse o tramo comprendido entre Setefogas e A Carballeira instalando luminarias de maior eficiencia enerxética.
Lembrar tamén que o rexedor confirmou a boa marcha das obras de rexeneración do paseo de Tanxil e que nos vindeiros días “abrirase a veciños e visitantes o primeiro treito do novo paseo sobre as praias de Tanxil e Quenxo”. Os traballos inclúen a restitución do treito que no seu día desapareceu a consecuencia do desprendemento de parte do cantil”.
