A cadea galega de establecementos Alda Hotels presentou este martes 2 de xuño, ante os medios de comunicación, os seus novos proxectos no Barbanza: Alda Corrubedo e Anosa Taberna, dúas iniciativas hoteleiras coas que a compañía busca consolidar a súa aposta polo desenvolvemento turístico da zona. O acto tivo lugar ás 12.00 horas nas instalacións de Alda Corrubedo, situadas na rúa Torreiro, 1, en Corrubedo, Ribeira.
A presentación contou coa participación de Alberto Rodríguez Boo, propietario de Alda Hotels, e coa asistencia do director da Axencia de Turismo de Galicia, Xose Manuel Merelles; a alcaldesa de Ribeira, Mariola Sampedro, a concelleira de Turismo de Ribeira, Ana Barreiro Rego; o alcalde de Boiro, José Ramón Romero García; e a responsábel de Turismo de Boiro, María Outeiral.
“O Barbanza recibiunos con Alda Ribeira, o noso primeiro establecemento na zona, e desde entón seguimos reforzando a nosa presenza con Alda Boiro, Alda Barraña Praia e Alda Corrubedo, un hotel de recente creación. Este último aloxamento incorpora, ademais, unha proposta de restauración da man da nova sociedade Restauradores de Cociña Atlántica e do restaurante Anosa Taberna, situado a carón do hotel”, sinalou Alberto Rodríguez Boo, director executivo (CEO) e fundador de Alda Hotels, quen explicou do seguinte xeito as orixes da cadea hoteleira: “Dende moi cativo vin de preto o que significan a formación, o esforzo e a capacidade de adaptarse. En 2008, con 29 anos, a empresa na que traballaba entrou en concurso de acredores. Foi entón cando puxen en marcha o primeiro hostel en Santiago, e aí comezou a historia de Alda”.
E engadiu: “A empresa do futuro será a que saiba integrar a Intelixencia artificial con intelixencia emocional, criterio e liderado humano. Debemos avanzar con cabeza, con fame e sen esquecer de onde vimos. Hai que adaptarse ao cambio, pero este negocio seguirá tratándose do mesmo: persoas que coidan de persoas”.
Tamén interveu a alcaldesa María Sampedro: “Para min, como alcaldesa, é unha honra participar na presentación deste aloxamento nun enclave tan especial como Corrubedo, o único lugar de Galicia que conta cun parque natural e un parque nacional. É moi positivo que unha empresa como Alda Hotels elixa Ribeira para seguir crecendo, coa apertura de dous hoteis na nosa cidade”.
Pola súa banda, o rexedor boirense, José Ramón Romero, quixo agradecer a Alberto e a Alda Hotels “que pensasen no Barbanza para seguir medrando e abrir catro hoteis na nosa comarca. Para nós é unha noticia moi positiva, porque seguimos traballando para contar con máis aloxamentos, máis prazas e máis capacidade hoteleira, unha necesidade cada vez máis evidente ante o crecemento da demanda turística”.
Deseguido, Xosé Manuel Merelles, director xeral de Turismo de Galicia, sinalou que “para a Xunta de Galicia sempre é unha gran satisfacción acompañar a apertura dun novo hotel nun enclave tan singular como Corrubedo e Ribeira. Contar cun sector hoteleiro sólido é fundamental para que quen nos visita poidan gozar plenamente de Galicia, da súa cultura, da súa natureza e da súa gastronomía. Quero felicitar tamén a Arousa-Barbanza polo seu traballo continuo para consolidarse como un dos destinos de calidade de Galicia, así como a Alda por esta nova apertura e por unha traxectoria que supera xa os 100 aloxamentos distribuídos polo norte de España. Para Galicia e para Turismo de Galicia é un orgullo contar cunha empresa como Alda, que contribúe ao crecemento e á profesionalización da nosa oferta turística”.
Desde Alda Hotels destacaron tamén que esta incorporación responde á vontade de “seguir crecendo en destinos con identidade propia, apostando por aloxamentos integrados na súa contorna e capaces de ofrecer ao visitante unha experiencia vinculada ao territorio, a gastronomía e o patrimonio natural da zona”.
Alda Corrubedo e Anosa Taberna nacen como unha proposta que combina aloxamento e restauración, orientada tanto a visitantes como ao público local, e pensada para contribuír á actividade turística de Corrubedo e do conxunto do Barbanza. A compañía subliñou que “esta apertura supón unha oportunidade para seguir xerando actividade na zona, fortalecer a oferta turística existente e acompañar o crecemento dun destino cun importante potencial vinculado ao mar, a natureza e a cultura local”.
Un enclave privilexiado
Situado fronte ao porto de Corrubedo e a escasos metros da praia, o novo aloxamento localízase nun dos espazos de maior atractivo turístico da comarca. A súa contorna inmediata inclúe o núcleo mariñeiro da localidade, as praias próximas e o Parque Natural das Dunas de Corrubedo e Lagoas de Carregal e Vixán, un dos principais referentes ambientais de Galicia.
Ademais da oferta de aloxamento, o establecemento incorpora un novo espazo de coworking en colaboración con Anosa Taberna, ampliando así os servizos dispoñíbeis para profesionais, equipos de traballo e visitantes que buscan combinar lecer e actividade laboral nunha contorna singular.
