Esta semana, o martes 9 e o mércores 10 proseguen os encontros veciñais Un café co alcalde do Concello de Boiro. Serán deste xeito dúas sesións na parroquia do Castro: unha o martes 9 de xuño ás 20.00 horas na unitaria do Esteiro, e a outra o mércores día 10 ás 20.00 horas no Centro Social de Cabo de Cruz.
O Castro será a penúltima parroquia que se visite no marco desta primeira volta de encontros coa veciñanza que teñen como finalidade que os veciños e veciñas de cada parroquia poidan poñer de manifesto as necesidades conxuntas de cada núcleo. Con estes encontros búscase ter un contacto máis directo coa cidadanía e dar a oportunidade á veciñanza de que trasladen as súas peticións e demandas sen necesidade de desprazarse ao Concello.
Estas reunións son un complemento das xuntanzas que o alcalde de Boiro, José Ramón Romero, e demais membros do Goberno manteñen semanalmente de xeito individual con veciños e entidades que así o solicitan.
