Dende o Concello de Rianxo informaron da posta en marcha de medidas específicas para combater os lumes forestais, medidas que foron habilitadas esta mesma fin de semana e que poñen o foco en disuadir a posíbeis incendiarios de prender lume no monte, e máis tendo en conta que Rianxo atópase entre os concellos de máis risco de sufrir incendios coa chegada de cada verán.
Segundo informaron o Concello e a Policía Local, “o dispositivo especial de vixilancia está orientado a detectar a existencia de lume nos nosos montes para atallalos o antes posíbel”, tentando “disuadir aos incendiarios con roldas periódicas por pistas forestais”.
Ademais, o 1 de xullo o Concello incorporará 5 persoas que conformarán a Brigada Municipal de Incendios de Rianxo. Unha brigada composta de un xefe de brigada, un condutor e tres peóns que levarán a cabo labores preventivas e de extinción de incendios no municipio.
Ante calquera indicio de lume, cómpre chamar ao 085. Tamén podemos chamar ao 112 ou á Policía Local de Rianxo.
