O Concello da Pobra do Caramiñal deu a coñecer este luns 29 de xuño a programación do Verán Cultural 2026, unha ampla proposta de actividades pensada para achegar a cultura á veciñanza e dinamizar os espazos públicos durante os meses de xullo e agosto.
A presentación estivo a cargo da concelleira de Cultura, Patricia Lojo, acompañada da técnica municipal de Cultura, Fita Sanisidro, coordinadora da programación.
Durante a súa intervención, Patricia Lojo destacou a aposta do Concello por unha oferta diversa, accesíbel e pensada para públicos de todas as idades.
“Queremos seguir facendo da cultura un punto de encontro e participación. Traballamos para ofrecer unha proposta diversa que anime á veciñanza a saír á rúa, compartir tempo e desfrutar do noso concello. Entendemos a cultura non só como unha oferta de lecer, senón tamén como unha ferramenta que dinamiza os espazos públicos e contribúe a facer da Pobra un concello máis vivo.”
A concelleira tamén agradeceu o traballo de todas as persoas que fan realidade esta programación e destacou, de maneira especial, o labor de Fita Sanisidro, responsábel da coordinación de todas as actividades.
Pola súa banda, Fita foi a encargada de presentar o calendario, que arrancará esta mesma fin de semana coa programación para público adulto do Festival Atlántica. O venres 3 de xullo, os xardíns do Pazo do Couto acollerán Raianas, de Irene Reina e Ricardo J. Martins, mentres que o sábado 4 será a quenda de Contiñas, de Marita Martínez, no Convento de Santo Antón. Ambos os espectáculos comezarán ás 21.00 horas.
O programa continuará durante xullo e agosto cunha ampla oferta para o público infantil e familiar, que incluirá espectáculos de música, maxia, teatro, novo circo, acrobacias e animación da man de Os Jalochos, Xavi Bufa, Joshua Kenneth, A Xanela do Maxín, Sue Moreno, Nelson Quintero Produccións, Inventi Teatro, Rendos Pequeno e María Faltri.
A música tamén terá un papel destacado, con varios concertos da Banda de Música da Pobra e da Banda de Música Candeán, aos que se sumarán dous encontros de música e baile tradicional organizados pola Asociación Xiada e o festival Caramiñas, promovido pola Asociación Amas de Casa. Esta entidade será tamén a encargada de organizar en agosto o tradicional Encontro de Habaneras.
A maior parte das actividades desenvolveranse no Cantón da Leña, aínda que a programación chegará tamén a outros espazos emblemáticos do municipio, como os xardíns do Pazo do Couto, o Convento de Santo Antón e a Igrexa de Santiago do Deán.
Esta programación conta coa colaboración da Rede Cultural da Deputación da Coruña e do programa Cultura no Camiño da Xunta de Galicia, reforzando así o compromiso do Concello coa promoción dunha oferta cultural ampla, diversa e de calidade durante todo o verán.
Toda a programación pode consultarse na páxina web municipal www.apobra.gal.
