O Concello da Pobra do Caramiñal acolleu este venres, 26 de xuño, dous actos institucionais na Casa do Concello para expresar a solidariedade co pobo de Venezuela e reivindicar a defensa da sanidade pública.
Ás 12.00 horas, representantes dos grupos municipais Nós Pobra, BNG, PSOE e VxP, xunto con veciñanza, participaron no minuto de silencio convocado pola Federación Galega de Municipios e Provincias (FEGAMP) en sinal de apoio ao pobo de Venezuela tras os terremotos rexistrados no país. Deste xeito, o Concello sumouse á convocatoria promovida pola entidade municipalista en toda Galicia.
Media hora máis tarde, o Salón de Plenos acolleu a lectura da declaración institucional conxunta en defensa da sanidade pública, asinada polos grupos municipais Nós Pobra, BNG, PSOE e VxP.
No documento, os grupos municipais asinantes reafirman o seu compromiso cunha sanidade pública, universal, gratuíta e de calidade como un dereito fundamental da cidadanía, ao tempo que subliñan o papel esencial da Atención Primaria na prevención, o diagnóstico e o seguimento da saúde da poboación.
A declaración recolle tamén a preocupación pola situación do Centro de Saúde da Pobra do Caramiñal, marcada pola insuficiencia de persoal sanitario, as demoras na atención e a perda de servizos, circunstancias que obrigan a numerosos veciños e veciñas a desprazarse a outros municipios para recibir asistencia sanitaria.
Neste contexto, os grupos asinantes instan á Xunta de Galicia e á Consellería de Sanidade a” adoptar as medidas necesarias para garantir unha dotación estábel de profesionais, reforzar os servizos de atención continuada e dar resposta ás necesidades asistenciais da veciñanza”.
Así mesmo, recoñecen o labor desenvolvido pola Plataforma en Defensa da Sanidade Pública da Barbanza e expresan o seu apoio á manifestación convocada para este 28 de xuño, animando á cidadanía a participar de maneira libre e responsable.
Con estes dous actos, o Concello da Pobra do Caramiñal sumouse a unha xornada de solidariedade e reivindicación, dando visibilidade tanto ao apoio ao pobo de Venezuela como á defensa dun sistema sanitario público, universal e de calidade.
