A Gramola Gominola cumpre dez anos enriba dos escenarios e celébrao coa publicación de Parabéns para nós! 10 anos en directo, un novo libro-disco que recolle a esencia dunha década de música, lingua e diversión compartida co público máis novo. A banda iniciou unha xira de presentación para levar o seu rock & roll en galego a diferentes localidades da xeografía galega. O 6 de xullo darán un concerto moi especial en Boiro, no marco da programación das Festas. Será ás 21 horas na praza do Centro Social.
Parabéns para nós! 10 anos en directo é unha celebración da música, da lingua e da imaxinación. Gravado en directo nun concerto no Auditorio Municipal de Bertamiráns (Ames), o quinto libro-disco da formación reúne once das cancións máis emblemáticas e queridas polo público gramoleiro, entre elas Non movas a crista, Superlingua ou A Gramola Gominola máis ti.
A publicación conta con ilustracións de Dani Padrón e está editada por Embora.
Este novo traballo recupera algúns dos personaxes máis memorábeis destes dez anos de traxectoria: o Monstro máis rockeiro, a enxeñosa Carmela, a Campioa Internacional ou a poderosa Superlingua. A través das súas historias e cancións, transmítense valores como a creatividade, a igualdade, a reciclaxe, o respecto pola natureza e o orgullo de vivir e medrar en galego.
O libro-disco xa está dispoñíbel na web de Embora, en librarías e grandes superficies, e tamén poderá adquirirse nos concertos da xira. Estas son as próximas datas confirmadas:
06/07/2026 – Boiro
10/07/2026 – Meis
11/07/2026 – Por anunciar
23/07/2026 – Compostela
23/08/2026 – Cangas
A Gramola Gominol está formada por Paco Cerdeira (Pakolas, Zenzar), Paula Romero (De Vacas, Coro Encaixe, banda de Guadi Galego), Anxelo de Xermar (Festicultores Troupe) e Rodrigo Muñoz (Di Elas, Lacón con Grelos).
