O Concello de Boiro celebrou este xoves día 28 de maio o pleno ordinario da Corporación correspondente ao mes de maio.
O pleno saldouse con acordos relevantes, como a proposta do Executivo local para requirir da Deputación os novos fondos necesarios para seguir poñendo en valor as construcións e a contorna ambiental do Pazo de Goiáns (lagar, vivenda e cortes). Esta proposición, aprobada por unanimidade, pretende continuar coa conservación e rehabilitación dos elementos patrimoniais do lagar pequeno, a vivenda e as cortes cun proxecto que ascende aos 252.332,38 euros. O proxecto que se pretende acometer contempla obras de consolidación urxentes de ámbito estrutural e tamén nas envolventes, executando as estruturas da cuberta derrubadas, saneado dos muros de pedra, a nivelación e conservación do piso, así como a recuperación ou instalación de carpinterías, portas e ventás das edificacións sobre as que se vai actuar.
Ademais, aprobouse a proposta do BNG para requirir da Deputación unha axuda para renovar o céspede de herba e cuberta das gradas no Campo de Fútbol de Vista Alegre.
A sesión, como de costume, pode verse íntegra mediante a canle municipal de YouTube.
Votacións da sesión
1. Aprobación da acta da sesión plenaria do 30 de abril de 2026 – aprobación con 12 votos a favor (PSOE, BNG e Boiro Novo) e 5 abstencións (PP).
2. Suplemento de crédito 1/2026 – aprobación con 15 votos a favor (PSOE, PP e Boiro Novo) e 2 votos en contra (BNG).
3. Suplemento de crédito 2/2026 – aprobación con 15 votos a favor (PSOE, PP e Boiro Novo) e 2 votos en contra (BNG).
4. Solicitude de subvención para a execución do proxecto de consolidación de edificacións de lagar, vivenda e cortes no entorno patrimonial do Pazo de Goiáns – aprobación por unanimidade (17 votos a favor).
5. Solicitude de subvención á Deputación da Coruña para a renovación do céspede de herba artificial e mellora da cuberta das gradas no Campo de Fútbol de Vista Alegre – aprobación por unanimidade (17 votos a favor).
6. Bonificación do ICIO do proxecto de creación dun ecosistema de vivendas inclusivas e servizos de apoio á vida en comunidade – aprobación por unanimidade (17 votos a favor).
