O sector pesqueiro galego dá un paso adiante ante un dos seus maiores desafíos: a falta de relevo xeracional. O vindeiro xoves 7 de maio ás 17:00 horas, a Escola Oficial Náutico Pesqueira de Ribeira será o escenario dunha xornada técnica que busca activar solucións reais para garantir o futuro do mar, asegurando a remuda xeracional.
A cita, enmarcada no proxecto de cooperación Relevo Xeracional: O Futuro do Mar, reunirá a representantes da administración, organizacións pesqueiras, centros educativos e profesionais do sector, nun encontro que pretende ir máis alá do diagnóstico e centrarse en propostas concretas, segundo confirmou a organización.
Impulsado polos Grupos de Acción Local do Sector Pesqueiro (GALP) de Galicia, en colaboración co GALP do País Vasco e financiado pola Consellería do Mar e o FEMPA, o proxecto nace cun obxectivo claro: ofrecer ferramentas para asegurar a continuidade dun sector estratéxico na nosa comunidade.
A xornada porá o foco na necesidade de atraer mocidade ao sector e en como facelo de maneira efectiva. Entre as claves do evento figuran as seguintes: o impulso da Formación Profesional Dual como vía real de acceso ao emprego no mar; a análise de experiencias de éxito en Galicia, no resto do Estado e en Europa; e a presentación de casos reais de empresas e profesionais que xa están protagonizando o relevo xeracional.
O encontro contará ademais coa participación de figuras clave do ámbito institucional e pesqueiro, así como responsables de centros de formación marítimo-pesqueira e entidades de referencia.
Historias reais para cambiar a mirada sobre o sector
Un dos momentos destacados será a proxección de pezas audiovisuais do proxecto, que recollen testemuños directos e experiencias reais vinculadas ao relevo xeracional, contribuíndo a visibilizar oportunidades e romper estereotipos sobre o traballo no mar.
Un punto de encontro para activar o futuro
Respecto do formato adoptado, as entidades organizadoras explican que “máis alá do contido técnico, a xornada está concibida como un espazo para conectar perfís, xerar oportunidades e construír rede, implicando a profesionais, alumnado e cidadanía no futuro do sector”.
O obxectivo é claro, sinalan, e non é outro que “apostar pola acción, situando o relevo xeracional como unha prioridade estratéxica para a sustentabilidade económica e social das zonas costeiras galegas”.
Datos da xornada
- Data: Xoves, 7 de maio de 2026
- Hora: 17:00 h
- Lugar: Escola Oficial Náutico Pesqueira de Ribeira
- Acceso: Con inscrición previa
