A Corporación municipal da Pobra do Caramiñal celebrou este xoves, 28 de maio, unha sesión ordinaria do pleno na que se trataron diferentes asuntos relacionados coa xestión municipal, o urbanismo, a facenda local e o medio ambiente.
A sesión comezou coa aprobación da acta anterior, correspondente ao pleno do 26 de marzo, e coa dación de conta dos decretos da alcaldía e outros asuntos.
No apartado de acordos, saíu adiante a proposta para a expropiación dunha franxa de 60 metros cadrados destinada á ampliación dun vial municipal, con sete votos a favor do grupo de goberno -formado por Nós Pobra, BNG, PSdeG-PSOE e VIP- e seis abstencións do Partido Popular.
Tamén foi aprobada a delegación na Deputación da Coruña de funcións relativas ao Imposto sobre Construcións, Instalacións e Obras (ICIO), neste caso con sete votos a favor e cinco en contra, tras a ausencia dunha concelleira durante a votación.
O pleno aprobou ademais por unanimidade o expediente de recoñecemento extraxudicial de crédito número 01/26, así como a adhesión aos convenios promovidos pola Xunta de Galicia para a xestión de residuos de aparellos eléctricos e electrónicos e de pilas e acumuladores.
Outro dos puntos debatidos foi o inicio do procedemento de revisión de oficio do nomeamento de Alberto Maneiro Liñares como persoal laboral fixo descontinuo na categoría de policía local, proposta que saíu adiante con sete votos a favor e cinco abstencións.
No apartado de mocións, as tres iniciativas presentadas polo grupo municipal do Partido Popular -relativas á sustentabilidade financeira, aos espazos públicos de lecer e a un plan de axudas para establecementos do municipio- foron rexeitadas por sete votos en contra e cinco a favor.
A orde do día completa pode consultarse na páxina web municipal e a sesión plenaria está dispoñíbel na canle de Youtube do Concello.
O pleno rematou coa quenda de rogos e preguntas.
