O Cine Elma da Pobra do Caramiñal acollerá este domingo 31 de maio, ás 19.30 horas, a representación da obra teatral Reunión familiar, unha comedia de humor ácido e costumista escrita e dirixida por Lois Basallo.
A función está organizada pola Asociación de Amas de Casa, C. e U. Caramiñas coa colaboración do Concello da Pobra do Caramiñal.
A obra sitúa ao público nunha reunión familiar marcada polas discusións, os reproches e as situacións absurdas protagonizadas por unha familia chea de personalidades moi distintas. O encontro, convocado por Ulpiano e Petronila, acaba derivando nun ambiente caótico no que a chegada do novo mozo da neta desencadea unha serie de malentendidos inesperados.
A través do humor e da sátira, Reunión familiar aborda cuestións como os prexuízos, as relacións familiares e a facilidade coa que ás veces se imaxina o peor.
O elenco está formado por Milagros Vázquez, Balbi Hermo, Isabel “A Rolita”, Manolo Paisal, Balbi Diéguez, María Martínez, Mariló Ríos e Lois Dafonte.
