O Bloque Nacionalista Galego (BNG) de Ribeira votou en contra do proxecto de Orzamentos para o ano 2026 presentado polo Partido Popular por, en palabras do voceiro local, o ex-alcalde Luís Pérez Barral, “responsabilidade coa veciñanza e para protexer os recursos de todos e todas”.
O portavoz do BNG explicou do seguinte xeito a que ao seu xuízo é a situación actual do Concello trala moción de censura de outubro de 2025: “Imaxinen que lle deixan a chave dunha casa nova, limpa, coa neveira chea e cartos para as facturas a un inquilino, e ao pouco atópanse a casa patas arriba e as facturas sen pagar. Iso pasa en Ribeira. Deixamos o goberno cun colchón histórico de 6,5 millóns de euros e proxectos nas parroquias por 1,5 millóns, e en sete meses o PP presenta un documento que pretende baleirar a carteira e deixar de lado os proxectos importantes. Vostedes son uns malos inquilinos”.
Pérez Barral puxo o foco nos Orzamentos actuais, que segundo indicou o equipo de Goberno son “as segundas contas municipais máis grandes da historia de Ribeira”, con 34.737.390,17 euros.
O portavoz nacionalista dixo que “esta cifra expansiva é grazas ao traballo rigoroso de captación de fondos externos desenvolvido polo BNG para impulsar Banda ao Río e Cerqueira”. E engadiu: “Votamos en contra porque deixamos os cartos, si, pero vostedes veñen a desvirtuar os proxectos”, criticando ao Executivo porque, dixo Pérez Barral, “o PP tentou que os fondos non viñeran para Ribeira e non apoiaron a proposta para solicitar eses mesmos fondos europeos dos que hoxe saca peito”.
Criticou tamén que o Executivo destine “ao mantemento, conservación e pavimentación apenas 350.000 euros, un ridículo 1% do orzamento total que supón unha baixada de 30.000 euros respecto ao ano anterior; e tamén caen en 30.000 euros as partidas para levar auga para consumo ás vivendas que carecen dela e redúcense en 350.000 euros as de saneamento, o que contrasta cos 5,5 millóns investidos polo BNG no rural en dous anos”.
Neste punto dixo estar en contra “de que o Goberno aumente en 782.000 euros o gasto corrente e teña a previsión de subir un cento de miles de euros a recadación por sancións de tráfico, até rozar os 300.000 euros”.
Con respecto ao Polígono os nacionalistas cualificaron de “inaudito” que o orzamento teña “cero euros para licitar o polígono industrial de Pedras Vermellas”. E no que atinxe á residencia de maiores, sinalaron que o Executivo “ten a intención de tirar ao lixo 800.000 euros xa investidos no proxecto das Saíñas para mandar agora a residencia pública de maiores ao monte, illando aos maiores”.
