O posicionamento político sobre a futura residencia de maiores en Ribeira volve xerar debate tras as críticas ao BNG, ao que a Xunta acusa de “xerar confusión” arredor da localización do proxecto.
Dende a Xunta lembran que “o Ministerio de Transición Ecolóxica lanzou unha consulta pública previa sobre a actualización da normativa de zonas inundábeis tras o desastre da DINA en Valencia” e que “coa súa entrada en vigor, a zona das Saíñas, na que se prevía construír a residencia de maiores, sería catalogada como área en risco de asolagamento”.
Engaden que a actualización da normativa sobre zonas inundábeis marcada polo Ministerio para a Transición Ecolóxica trala DINA “podería afectar a áreas como As Saíñas, onde inicialmente estaba prevista a construción do centro”.
Deste xeito, o Goberno autonómico advirte que “unha vez entre en vigor a nova normativa, esta zona podería ser considerada de risco de inundación, o que impediría levantar nela unha infraestrutura destinada a persoas maiores e dependentes”. Por este motivo, considérase que “non sería viábel iniciar a construción nun emprazamento que poida supoñer un perigo futuro”.
Así mesmo, sinálase que tanto a Xunta como o Concello estarían xa avanzando nos trámites para situar a residencia noutra parcela alternativa cedida polo Consistorio, tamén en Ribeira. “Esta nova localización ofrecería mellores condicións técnicas e unha maior proximidade ao núcleo urbano e aos servizos básicos”, sinala a Xunta.
O debate sobre o emprazamento da futura residencia continúa así aberto, cunha discusión centrada na seguridade, a planificación urbanística e a adecuación dos espazos dispoñíbeis.
