O Concello da Pobra do Caramiñal presentou na mañá deste xoves 28 de maio a nova programación municipal de viaxes ás Illas Atlánticas de Galicia, unha iniciativa impulsada pola Concellería de Turismo en colaboración coa navieira Piratas de Nabia e que permitirá realizar saídas ás illas Cíes, Ons e Sálvora ao longo dos vindeiros meses.
Na rolda cos medios participaron a concelleira de Turismo, Estefanía Ramos; a técnica municipal de Turismo, Ángeles Tubío; e a directora da navieira Piratas de Nabia, Susi Acuña; quen deron a coñecer os detalles das rutas, horarios, prezos e novidades desta edición.
A axenda inclúe saídas ás illas Cíes os días 28 de xuño e 6 de setembro; á illa de Ons o 26 de xullo e o 23 de agosto; e á illa de Sálvora o 19 de xullo. Ademais, como novidade, este verán levarase a cabo a experiencia Starlight na Illa de Sálvora, unha actividade nocturna de observación astronómica prevista para o 8 de agosto.
As rutas realizaranse con saída dende o porto da Pobra do Caramiñal e inclúen transporte marítimo e visitas guiadas, permitindo achegar á veciñanza e ás persoas visitantes ao Parque Nacional das Illas Atlánticas de Galicia.
Dende o Concello destacaron a importancia de seguir apostando por “iniciativas vinculadas ao turismo sostíbel, a divulgación do patrimonio natural e a promoción da Pobra como punto de partida para descubrir as Illas Atlánticas”.
As reservas poden realizarse a través da páxina web de Piratas de Nabia.
