O 6 de xuño, ás 20.00 horas, a Unidade de Música do Cuartel Xeral do Mando de Apoio á Manobra (MAM), con sede na Coruña, ofrecerá un concerto no Teatro Cine Elma da Pobra do Caramiñal. Con esta actuación, enmarcada nos actos de celebración do Día das Forzas Armadas 2026, o MAM quere achegarse ao maior número posible de veciñanza e visitantes, co obxectivo de “dar a coñecer as tradicións e actividades militares”.
O concerto será gratuíto e o acceso libre ata completar a capacidade do recinto. O repertorio incluirá as seguintes pezas: Yorckscher Marsch, de Ludwig van Beethoven; Versalles, de Sergue Lancen; El Año del Dragón, de Philip Sparke; Arabesque, de Samuel Hazo; Louis Armstrong Legend, con arranxos de Giancarlo Gazzani; e Benny Goodman, con arranxos de Naohiro Iwai.
O Concello da Pobra do Caramiñal convida á cidadanía a achegarse ao Teatro Cine Elma para desfrutar desta cita musical.
Unidade de Música do Cuartel Xeral do Mando de Apoio á Manobra
Esta Unidade de Música ten a súa orixe no ano 1875, coa creación do Rexemento de Infantería Zamora no 29. Posteriormente integrouse nos Rexementos de Infantería “Isabel a Católica” no 54 e Zamora no 29, así como no Rexemento de Artillería de Campaña no 28, ata o ano 1966, cando quedou constituída como Música do Goberno Militar da Coruña.
En xullo de 1998 pasou a formar parte do Batallón do Cuartel Xeral do Mando Rexional Noroeste e, o 1 de xullo de 2005, da Xefatura da Subinspección Xeral do Exército no 4. O 15 de outubro de 2010 integrouse no Cuartel Xeral da Forza Loxística Operativa e, finalmente, o 1 de xaneiro de 2021 integrouse no Cuartel Xeral do Mando de Apoio á Manobra. Día das Forzas Armadas
O Día das Forzas Armadas remóntase ao ano 1978, cando se estableceu a celebración dun acto institucional que servise de homenaxe aos Exércitos e á Armada, co obxectivo de fomentar o seu coñecemento e integración na sociedade.
En España, o Día das Forzas Armadas (DIFAS) celébrase anualmente o sábado máis próximo ao 30 de maio, festividade de San Fernando.
Trátase dunha xornada para coñecer o traballo que os militares desenvolven dentro e fóra das nosas fronteiras, así como o seu labor permanente de vixilancia e protección do territorio nacional e a súa contribución á defensa da paz e da liberdade no mundo.
